'Casa O'Rei' participará no Certame de Teatro de Haro
A montaxe é unha das 6 escollidas de entre as 89 propostas recibidas nesta edición | Xoves, 11 Outubro 2018 00:00
Casa O'Rei de Ibuprofeno Teatro participará na 21ª edición do Certame de Teatro Garnacha de Rioja que se celebra na localidade de Haro do 30 de novembro ao 8 de decembro. A compañía galega xa participou coa obra 'Raclette' no mesmo certame, recibindo a Mención Especial do Xurado.
De entre as 89 propostas recibidas 6 serán os espectáculos presentados nesta edición: 'Casa O'Rei' de Ibuprofeno Teatro dará o pistoletazo de saída o 30 de novembro, o 1 de decembro Alquibia Teatro (Murcia) presentará 'Los Caciques', o 2 de decembro será a quenda de Hika Teatroa (San Sebastián) con 'El Bodorrio'. O 6 de decembro La Fundición Teatro (Sevilla) presentará 'Duelo a muerte del marqués de Pickman y lo que aconteció despúes con su cadáver', o 7 de decembro Morboria Teatro (Madrid) presentará 'De fuera vendrá quien de casa nos echará' e o 8 de decembro Txalo Producciones (Hernani) 'Mandíbula afilada'.
'Casa O'Rei' é un xogo escénico e dramatúrxico a partir de 'O Rei Lear' de Shakespeare, a acción trasládase da corte de Bretaña a unha casa de comidas galega. Unha casa que acabará por derrubarse e con ela caerá tamén un modo de entender a gastronomía e a sociedade, no que a familia é fundamental. Esta familia está encabezada por Manolo Rei, ao que dá vida Miguel Borines. Victoria Teijeiro (Maribel), Marián Bañobre (Rita), Teté García (Cordelia), Víctor Mosqueira (Cosque) e Xosé Manuel Esperante (Albino) completan o elenco.
